Skip to content
Претседателката на Европската комисија, Урсула фон дер Лајен, изрази жалење поради одлуката на САД да воведат царини на увозот на автомобили од Европската Унија.
„Царините се даноци – лоши за бизнисите, уште полоши за потрошувачите, во САД и ЕУ“, објави Лајен на платформата X.
Таа додаде дека Европската Унија ќе продолжи да бара решенија преку преговори, додека истовремено ги штити своите економски интереси.
Трамп: Можно зголемување на царините за ЕУ и Канада ако работат против САД
Американскиот претседател Доналд Трамп изјави дека би можел да воведе повисоки царини за Европската Унија и Канада доколку тие соработуваат на начин што ќе ѝ нанесе економска штета на САД.
„Ако Европската Унија работи со Канада за да ѝ нанесе економска штета на САД, ќе бидат воведени огромни царини – многу поголеми од оние што се моментално планирани – за да се заштити најдобриот пријател што секоја од овие две земји некогаш го имала“, напиша Трамп на својата социјална мрежа Truth Social.
Трамп во средата најави царини од 25% на увозните возила, што дополнително го продлабочи глобалниот трговски конфликт и предизвика критики и закани со реципрочни мерки од сојузниците на САД, пренесува Ројтерс.
Канадскиот премиер Марк Карни ги нарече овие царини „директен напад“ врз канадските работници и најави дека Канада разгледува можни контрамерки.
Новите царински давачки ќе стапат на сила на 3 април, ден по најавата на Трамп за воведување реципрочни царини за земјите што придонесуваат за најголемиот дел од американскиот трговски дефицит, пишува агенцијата.
Овие мерки следуваат по веќе воведените царини на челик и алуминиум, како и на стоки од Мексико, Канада и Кина.
Европската Унија најави дека ќе го одложи воведувањето на првиот пакет контрамерки до средината на април, што вклучува царина од 50% на американскиот бурбон.
Како одговор, Трамп се закани дека ќе воведе царина од 200% на сите вина и други алкохолни производи од ЕУ доколку Унијата продолжи со своите мерки.
