Skip to content
Обилниот дожд кој од утрово ја погодува Македонија најсилно удри во југозападниот дел од земјата. До 16:30 часот, според мерењата на УХМР, најмногу дожд наврна во Претор и Крушево – по 16 литри на метар квадратен, 12 литри во Маврови Анови, 10 во Берово, 9 во Прилеп, осум во Пожаране, седум во Тополчани и Струмица, шест во Виница и на Попова Шапка, пет во Лазарополе и Штип, четири кај Зајчев Рид и Тетово, три во Гевгелија, Демир Капија, Крива Паланка и Битола, два во Велес и еден литар во Кавадарци.
Метеоролозите предупредуваат дека до крајот на денот ќе остане претежно облачно, со повремени локални врнежи од дожд, особено во југозападните и јужните делови, каде за 24 часа се очекуваат над 30 литри на метар квадратен. Дува слаб до умерен јужен ветер, кој дополнително го носи влажниот бран над котлините и долините каде што веќе има натопени почви и зголемен ризик од појава на одрони на патиштата.
Во Охридско-струшкиот регион, каде веќе неколку денови наназад врнежите се интензивни, локалните служби алармираат за големи количини површинска вода и зголемен доток во Охридското Езеро. Според хидролошките податоци, во силни дождливи периоди југозападот може да добие над 30 литри на метар квадратен за едно деноноќие, што директно се одразува врз нивото на Езерото и водостојот на Црн Дрим кај Струга.
Очекувањата се дека во текот на ноќта езерото ќе продолжи да се полни, а водата ќе се регулира преку истекот во реката Црн Дрим. Управувањето со нивото на Охридското Езеро веќе шест децении е поврзано со контролираниот испуст преку преградата во центарот на Струга – регулацискиот објект познат како „дрвениот мост“, преку кој се контролира истекот кон хидроелектраните по течението на Црн Дрим и истовремено се штити градот од поплави.
Со реконструкцијата на овој објект, започната есенва, АД ЕСМ и ХЕС „Црн Дрим“ најавија поефикасна и пофина регулација на протокот – што е клучно во вакви дождливи бранови, кога езерото побргу се полни, а треба да се задржи во безбедна кота и за екосистемот и за градовите покрај брегот.
Во останатиот дел од земјата, УХМР за утре најавува утринска магла по одделни котлини, а преку ден променливо облачно време, со повремен локален дожд претпладне и кон крајот на денот. Минималните температури ќе се движат од 7 до 11 степени, а максималните од 15 до 19 степени. Во Скопје се очекува претежно облачно време со повремени послаби врнежи и умерен југоисточен ветер, со температурен распон од 8 до 17 степени.
Она што ги загрижува метеоролозите и службите на терен е продолжениот влажен период под влијание на циклонска активност. И во петок и во викендот се очекуваат нови, пообилни врнежи – над 30 литри на метар квадратен за 24 часа, локално и во форма на невреме со засилен ветер и ретки грмежи. На веќе натопена почва тоа значи поголем ризик од поројни поплави во помалите речни корита и појава на одрони и лизгања на поосетливите патни правци, особено во западниот и југозападниот дел на земјата.
Од недела, прогнозите најавуваат поинаков тип непогода: значително опаѓање на утринските и дневните температури, со што дождот на повисоките планини ќе премине во снег. Планинските превои и високите места ќе добијат прв посериозен снежен слој оваа есен, па возачите ќе мора да бидат подготвени за зимски услови – влажни и лизгави коловози во котлините и снежни, замрзнати делници на планинските патишта.
