Skip to content
Премиерот Христијан Мицкоски потврди дека Ленче Ристоска за Владата не е кандидат за државен јавен обвинител, иако Советот на јавни обвинители даде позитивно мислење за неа.
Со ова тој стави јасно до знаење дека елиминацијата е резултат на политичкиот судир помеѓу власта и поранешната обвинителка на СЈО, која води активни предмети против владејачката партија.
Иако законската процедура налага Владата да ги разгледа записниците од Советот на јавните обвинители пред да донесе одлука, премиерот Христијан Мицкоски во телевизиско гостување на Канал 5 прејудицираше дека Ленче Ристоска „апсолутно не е во игра“.
Оваа изјава јасно укажува дека изборот на новиот шеф на Јавното обвинителство нема да се базира исклучиво на мерит-системот и оценките од фелата, туку ќе биде силно филтриран низ политичката призма на владејачката ВМРО-ДПМНЕ.
Главната причина за ваквиот став лежи во фактот што Ристоска е обвинителката која го застапува предметот „Талир“, кој се однесува на незаконското финансирање на партијата ВМРО-ДПМНЕ и кој резултираше со замрзнување на партискиот имот, вклучувајќи го и седиштето на партијата. Нејзиниот избор на највисоката обвинителска функција би претставувал директна закана за интересите на владејачката гарнитура.
Постапката за избор на наследник на Љубомир Јовески влезе во клучна фаза откако Советот на јавните обвинители ги разгледа досиејата на пријавените кандидати. Од петмина пријавени, Советот достави позитивно мислење до Владата за четворица кандидати кои ги исполнуваат законските услови и поседуваат соодветен професионален интегритет. Сепак, еден кандидат беше експресно отфрлен поради недостиг на потребниот работен стаж.
Листата на кандидати која беше проследена до извршната власт ги вклучува:
- Анита Тополова-Исајловска – актуелната вршителка на должноста државен јавен обвинител, која се смета за кандидат на континуитетот.
- Ленче Ристоска – обвинителка во ОЈО Скопје и офицер за врски во Еуроџаст, позната по својата работа во поранешното СЈО.
- Лидија Раичевиќ – обвинителка од скопското обвинителство со искуство во сложени предмети.
- Ненад Савевски – судија во Основниот кривичен суд Скопје.
Поранешниот претседател на Кривичниот суд, Владимир Панчевски, беше едногласно одбиен бидејќи, иако има 12 години стаж, во моментот не врши функција на судија или обвинител, што е законски предуслов.