Мијалков продолжува да гради хотел во Горица, реагираат активисти на Граѓанската иницијатива Охрид СОС

Активисти на Граѓанската иницијатива Охрид СОС алармираат дека висок партиски функционер се обидува да присвои државно земјиште на една од најатрактивните локации во Охрид, веднаш над езерото. Според информациите, во 2007 година се изготвува Урбанистички план кој го пренаменува дел од парк-шумата Горица во градежно неизградено земјиште со намена за хотелски комплекс. Во тоа време, градоначалник на Општина Охрид бил Александар Петрески.

Во почетокот на 2011 година, Министерството за транспорт и врски, предводено од Миле Јанакиески, објавува јавно наддавање за отуѓување на државно земјиште за изградба на хотел на Охридското Езеро. Победува фирмата на партискиот функционер, „Дивелоп груп“ на Сашо Мијалков, која добива катастарска парцела од 15.878 m². Во летото на истата година, на оваа локација е подметнат пожар, при што горат треви и борови. Според МВР, поради недостаток на соодветна пријава од инспекторатот за пожари, нема истрага за предизвикан пожар. Теренот се расчистува, а покрај изгореното се сечат и здрави стебла, што создава огромен простор што потоа се оградува и останува така една деценија.

Иако имотот на Мијалков е замрзнат поради судски процеси, Општина Охрид, наместо да раскине договорот, два пати потпишува анекс за да му овозможи на Мијалков да не го изгуби земјиштето. Првиот анекс бил потпишан од градоначалникот Никола Бакрачески во 2013 година, а вториот од градоначалникот Константин Георгиески во 2020 година. Овој процес го водат двете најголеми партии, а медиумите се покажуваат незаинтересирани и одбиваат да истражат.

Граѓанската иницијатива Охрид СОС побарала комплетна документација од институциите и, со цел да се истражи и објави на јавноста, ја понудила на неколку истражувачки редакции. Сепак, ниту еден од медиумите не ја истражил како што тврдат, иако постоела иницијална согласност.

На крајот, по застарата на дел од делата за кои беше гонет Мијалков, а со измените на Кривичниот законик, тој беше ослободен, а правосудниот систем бил вешто изигран. Даночните обврзници, односно државата, мораа да му ги исплатат адвокатските трошоци. Минатата година, проектот за изградба на хотел на оваа локација продолжи без никакви пречки.

Проектот за изградба на хотел во Горица никогаш не бил доставен до Комисијата за управување со природното и културното наследство на Охридскиот Регион, ниту бил ревидиран од аспект на неговата усогласеност со Планот за управување со природното и културното наследство на Охридскиот Регион (2020-2029). Овој план експлицитно забранува градежно зафаќање на релјефни возвишенија кои ќе го нарушат крајбрежниот пејзаж. Охрид СОС го вклучи овој случај во своите коментари до Реактивната Мониторинг Мисија на UNESCO, IUCN и ICOMOS, кои го посетиле Охрид минатата година.

Во Извештајот за состојбата со заштитата на природното и културното наследство на Охридскиот Регион, Владата манипулативно наведува дека сите нови или измени на урбанистички планови се во согласност со Планот за управување. Овој проект за Горица го побива тоа, и е пример кој ја покажува злоупотребата на службените позиции за лични интереси. Локалните моќници и партиски членови практично бесплатно добиваат државно земјиште на атрактивни локации, додека јавниот интерес се занемарува.