Монетарни движења: Пад на депозити и раст на кредити во јануари 2025

Според најновото соопштение на Народната банка на Република Северна Македонија, во јануари 2025 година, паричната маса (монетарниот агрегат М3) бележи намалување од 1,6% на месечна основа, главно поради падот на депозитните пари, со негативен придонес и од краткорочните депозити и готовите пари во оптек. На годишно ниво, паричната маса се зголемува за 9,1%, благодарение на растот на депозитните пари, долгорочните депозити до две години, готовите пари во оптек и краткорочните депозити.

Вкупните депозити во јануари бележат месечен пад од 1,3%, целосно поради намалените депозити на корпоративниот сектор, додека депозитите на домаќинствата се зголемуваат. На годишно ниво, вкупните депозити растат за 11,0%, најмногу поради зголемените депозити на домаќинствата, со позитивен придонес и на депозитите на корпоративниот сектор.

Во јануари, вкупните кредити се намалени за 0,1% на месечна основа, како резултат на падот на кредитирањето на корпоративниот сектор, при раст на кредитите на домаќинствата. На годишна основа, забележан е раст од 11,3%, којшто се должи на зголеменото кредитирање кај двата сектора, со поголем придонес на корпоративниот сектор.

Во јануари, вкупните депозити на корпоративниот сектор бележат пад од 5,0% на месечна основа, што произлегува од падот на депозитните пари, како и од падот на краткорочните и долгорочните депозити во странска валута, во услови на раст на долгорочните и краткорочните депозити во денари. На годишна основа, остварен е раст од 5,7%, којшто се должи на растот на депозитите на сите компоненти, со поголем придонес на краткорочните и долгорочните депозити во денари, при раст и на краткорочните и долгорочните депозити во странска валута и на депозитните пари.

Овој месец, кај кредитите на корпоративниот сектор е забележано намалување од 0,4% на месечно ниво, како резултат на падот на кредитите во денари, додека кредитите во странска валута бележат раст. Кредитите на корпоративниот сектор се зголемени за 14,2% на годишно ниво, во целост поради зголеменото кредитирање во денари.

Во јануари, вкупните депозити на домаќинствата бележат месечно зголемување за 0,2%. Промената се должи на растот на долгорочните и краткорочните депозити во денари и во странска валута, во услови на пад на депозитните пари. Годишниот раст изнесува 14,2% и произлегува од повисоките депозитни пари и долгорочните депозити во денари и во странска валута, при пад на краткорочните депозити во странска валута и во денари.

Кредитите на домаќинствата бележат месечен и годишен раст за 0,2% и 8,8%, соодветно, во поголем дел поради зголеменото кредитирање во денари, при раст и на кредитите во странска валута.

Во јануари, гледано според намената на кредитите одобрени на физичките лица, кај потрошувачките кредити, како најзастапена категорија, е остварен месечен пад од 0,3%, при годишен раст од 8,4%, додека станбените кредити се зголемени за 0,5% и 12,7% на месечно и на годишно ниво, соодветно. Овој месец, автомобилските кредити бележат месечен и годишен раст од 0,7% и 5,1%, соодветно. Во јануари, кај кредитите одобрени на кредитни картички е забележан пад од 1,1% и 9,0% на месечно и на годишно ниво, соодветно. Кај негативните салда на тековните сметки, овој месец е остварен месечен раст од 11,4%, при годишен пад од 4,6%, додека кредитите одобрени врз други основи се намалени за 1,2% и 10,2% на месечна и на годишна основа, соодветно.

Овие податоци се објавени од Народната банка на Република Северна Македонија и се достапни на нивната официјална веб-страница.