На новогодишната ноќ 18 лица со алкохолно труење, 13-годишно дете со траен инвалидитет од петарда

На новогодишната ноќ 18 лица со акутно труење од алкохол биле примени на Клиниката за токсикологија во Скопје, а најмладиот пациент е само 14 години. Дополнително, 13-годишно дете се здобило со тешка повреда на раката од петарда, што ќе резултира со траен инвалидитет.

Според директорот на Клиниката за токсикологија, Андон Чибишев, ноќта поминала релативно мирно. Прегледани се вкупно 21 пациент, од кои 18 со акутно труење од алкохол – 4 жени на возраст од 17 до 26 години и 14 мажи на возраст од 14 до 38 години. Еден од пациентите мешал алкохол со медикаменти, што дополнително ја влошило состојбата. Сите пациенти се пуштени на домашно лекување по примената терапија.

На Универзитетската клиника за хируршки болести „Св. Наум Охридски“, според директорот Небојша Настов, се прегледани 81 пациент. Пет лица биле примени поради сообраќајни несреќи, тројца поради физички пресметки, а извршени се три оперативни интервенции. Иако на новогодишната ноќ немало нови повреди од петарди, претходниот месец биле регистрирани околу 50 случаи, претежно кај малолетници.

Доктор Игор Мерџановски од Ургентниот центар информира дека биле извршени 35 прегледи, од кои 9 поради лесни сообраќајни повреди. Едно дете со тешка повреда на раката од петарда е оперирано на Детската клиника и ќе има траен инвалидитет.

Според здравствените институции, работата за време на новогодишната ноќ била за околу 30 проценти помала во споредба со претходните години.