Skip to content
За една година од почетокот на програмата на Обединетите нации – „Зелен финансиски инструмент за подобрување на квалитетот на воздухот и борба со климатските промени во Северна Македонија’’ (Green Finance Facility – GFF) над 50 мали и средни претпријатија и недоволно опслужени домаќинства станаа корисници на програмата. Инсталирање фотоволтаици, сончеви колектори, топлински пумпи, изолација, прозорци, врати и други „зелени“ технологии, се дел од практиките и решенијата за зелена транзиција, придонесувајќи кон целите на одржлив развој на земјата.
Лиза Курбиел, Раководител на Секретаријатот при Заедничкиот фонд при Обединетите нации за Целите за одржлив развој (United Nations Joint SDG Fund) во своето обраќање изјави ваквите програми служат за да се адресираат најважните глобални предизвици. „Зелениот финансиски инструмент е одличен пример за тоа што може да се постигне кога ќе се комбинираат глобалните ресурси, локалното знаење и заедничката амбиција. Ние сме голем поддржувач на програмата, каде со заеднички напори се одвоени 46 милиони долари за постигнување енергетска ефикасност и обновливи извори на енергија.“
Постојаниот претставник на УНДП, Армен Григорјан ја потенцираше потребата од оваа програма, со оглед на проблемот со загадување на воздухот во земјата. „Решенијата постојат, но транзицијата кон почисти технологии и практики бара значителни инвестиции, а пристапот до финансии е голема бариера. Токму затоа, Зелениот финансиски инструмент игра клучна улога. Програмата овозможува пристап до финансии и техничка помош за оние на кои им е најпотребно – малите и средни претпријатија како и недоволно опслужените домаќинства од социјални групи како жени, самохрани родители, лица со попреченост, приматели на дознаки, повратници од странство и др. Дополнително на тоа, ова е финансиски механизам во кој се здружени повеќе партнери со иста цел – забрзувањето на зелената транзиција во земјата за постигнувањето на Агендата 2030 и целите на одржливиот развој“ рече Григорјан.
Настанот го одбележа и потпишување договори за нови партнерства со Комерцијална Банка и ТТК Банка. Со нив ќе станат достапни дополнителни 5,5 милиони долари за финансирање инвестиции во обновливи извори на енергија и енергетска ефикасност за мали и средни претпијатија и за домаќинствата.
Програмата „Зелен финансиски инструмент за подобрување на квалитетот на воздухот и борба со климатските промени во Северна Македонија“ е финансиран од Заедничкиот фонд за Целите за одржлив развој при Обединетите нации, Владата на Република Северна Македонија, Европската банка за обнова и развој и локални финансиски институции. Програмата е имплементирана од УНДП во партнерство со IOM, UNECE и EBRD.
Заедничкиот фонд при Обединетите нации за Целите за одржлив развој е финансиран со придонес од Европската Унија и владите на Белгија, Данска, Германија, Ирска, Италија, Луксембург, Монако, Холандија, Норвешка, Португалија, Република Кореја, Саудиска Арабија, Шпанија, Шведска, Швајцарија и партнерите на Фондот од приватниот сектор – за трансформативно движење кон постигнување на Целите до 2030.
