Намален извозот, трговскиот дефицит до октомври 2,62 милијарди евра

Во првите десет месеци од 2024 година, вкупната вредност на извозот на стоки од Северна Македонија изнесувала 6,56 милијарди евра, што е намалување од 5,5 % во споредба со истиот период минатата година, покажуваат податоците на Државниот завод за статистика.

Увозот, пак, достигнал вредност од 9,19 милијарди евра, бележејќи мал пад од 0,5 %. Како резултат на тоа, трговскиот дефицит за периодот јануари – октомври 2024 година изнесува 2,62 милијарди евра, додека покриеноста на увозот со извоз се задржува на 71,4 %.

Во извозот доминираат катализаторите со благородни метали, сетовите на проводници за возила, делови за седишта и други технички производи. Увозот, од друга страна, најмногу опфаќа нафтени масла, метали од платинската група, платина и моторни возила за превоз на лица.

Северна Македонија најмногу тргувала со Германија, Велика Британија, Грција, Кина и Србија, кои се главните партнери во надворешната трговија за овој период.