Не е само Скопје и во другите градови на Македонија не се дише, мерки нема

Скопје утрово се најде на 7. место на светската листа на најзагадени градови според индексот на квалитет на воздухот на платформата IQAir. Министерството за животна средина (МЖСПП) објави дека и Струмица влегува во категоријата на екстремно загадени општини. Освен во овие два града, загаден воздух е регистриран и во Тетово, Битола, Кичево и други градови низ Македонија, каде што концентрациите на ПМ 2,5 честичките се натпросечни.

Воздухот во Скопје е категоризиран како „нездрав“ со индекс од 187. Лахор (Пакистан), Делхи (Индија) и Вухан (Кина) се првите три на листата на најзагадени градови.

МЖСПП информираше дека во Струмица е надминат алармниот праг на загаденост. Според општинските власти, главните извори на загадување се согорувањето на биомаса, кое учествува со 35% годишно, особено во зимскиот период, и сообраќајот.

Во рамките на проектот „Справување со загадувањето на воздухот“ се вршеа мерења во училиштата и градинките во Гостивар, Кавадарци, Куманово, Струга и Струмица, со цел да се утврдат нивоата на загаденост.

Министерството препорача засилени инспекции на еколошките инсталации и градилиштата, како и проверки на техничката исправност на возилата, посебно дизел-возилата. Забрането е горење на отворено, а работодавачите треба да овозможат ослободување од работа за ранливите групи, како и реорганизација на работното време за оние што работат на отворено.

Дополнително, се препорачува да не се организираат спортски и културни настани на отворено, додека инсталациите со континуиран мониторинг на загаденоста да ги направат податоците достапни за јавноста.

Извештаите на МЖСПП покажуваат дека среднодневните концентрации на ПМ10 честичките вчера ги надминале дозволените граници на локации во Скопје, Тетово, Битола, Гостивар, Охрид, Кичево, Велес, Кавадарци и Куманово, укажувајќи на широка и алармантна загаденост низ целата држава.

Состојбата бара итни и одлучни мерки за заштита на животната средина и јавното здравје.