Нов повик за субвенциониран студентски оброк – проширени критериумите за аплицирање

Министерството за образование и наука (МОН) отвори нов повик за пријавување за субвенциониран студентски оброк, откако неодамна беа усвоени измени на Законот за студентски стандард. Со новите правила, правото на оваа финансиска поддршка го добиваат повеќе студенти отколку досега.

Согласно измените, субвенционираниот оброк го добиваат сите редовни студенти запишани на:

• Прв или втор циклус на студии,
• Интегрирани студии (како што се студиите по медицина или право),
• Државни и приватни универзитети во Северна Македонија,

при услов да се државјани на Република Северна Македонија и да немаат месечен приход – од каков било извор – поголем од минималната нето-плата за тековната година.

Со оваа промена, веќе не е услов студентите да не бидат во редовен работен однос или да не се регистрирани како индивидуални земјоделци – што беше ограничување во претходната регулатива.

Како и кога се аплицира?

Пријавувањето се врши електронски преку порталот „е-услуги“, најдоцна до среда, 16 април 2025 година.
Дополнително, МОН информира дека секој месец, во период од 1-ви до 5-ти, студентите ќе можат да аплицираат за добивање на ова право за тековниот месец од академската 2024/2025 година.

Кога се добиваат парите?

Сите студенти кои успешно ќе го остварат правото, ќе ги добиваат средствата во месецот што следи по месецот на аплицирање.

Колкав е износот и како се користи?

Субвенционираниот студентски оброк изнесува 140 денари дневно, и се доделува со намена за купување на приготвена храна.
Средствата може да се користат од понеделник до сабота. Ако студентот не го искористи правото некој ден, износот останува достапен до крајот на седмицата – заклучно со сабота.

Правото на користење не важи:

• Во периодот од 1 јули до 1 октомври,
• За време на државни празници и неработни денови.

За помош при аплицирање
Студентите кои имаат потреба од поддршка при пријавувањето може да се обратат на електронската адреса:
📧 subvencioniran.obrok@mon.gov.mk

Целосниот јавен повик може да се најде на веб-страницата на МОН или директно преку платформата за е-услуги.