Skip to content
Заменик-градоначалникот на Скопје, Александар Трајановски, денеска ја најави својата оставка на седницата на Советот на Град Скопје, наведувајќи како причина наводен мобинг и притисоци врз вработените од страна на градоначалничката Данела Арсовска и раководството на Градот. Според него, со Градот управува ДУИ од Сарај, а ветената департизација останала само празна реторика.
Трајановски, кој во септември 2022 беше назначен од Арсовска на функцијата, е советник во Советот на Град Скопје од редовите на ГРОМ. Во своето обраќање, тој истакна дека не сака да биде заменик-градоначалник на Сарај и обвини дека сите ресурси на градот се насочени кон оваа општина, на штета на останатите делови на Скопје. Дополнително, посочи дека градското раководство системски врши мобинг и репресија врз вработените, стопанствениците и инвеститорите.
Но, веднаш по неговата изјава, од Град Скопје пристигна демант во кој се тврди дека Трајановски не може да даде оставка од функција од која е разрешен пред три месеци, на 19 декември 2024 година. Од Градот велат дека тој бил отстранет поради нарушување на угледот на институцијата и неизвршување на своите обврски. Според нив, Трајановски имал само едно барање – службена канцеларија, возило и телефон, без реален ангажман во работата на Градот.
Во реакцијата, Градот категорично ги негира тврдењата за влијание на ДУИ, истакнувајќи дека две години немало нови вработувања поради неизгласани планови. Дополнително, се поставува прашањето зошто Трајановски немал забелешки за работата на Градот додека бил на функцијата, а сега излегува со остри обвинувања.
Овој најнов конфликт само ја продлабочува кризата во градската власт, каде континуираните судири и обвинувања меѓу поранешните сојузници покажуваат дека политичките интереси го засенуваат функционирањето на институциите. Граѓаните остануваат сведоци на уште една политичка пресметка, додека клучните проекти за развојот на градот остануваат во сенка на оваа драма.
