Skip to content
На Град Скопје му се заканува целосна блокада откако градоначалничката Данела Арсовска не го поднесе предлог-буџетот за 2025 година во законскиот рок. Ова го објави советникот од ВМРО-ДПМНЕ, Стефан Кирков, на прес-конференција, предупредувајќи на сериозни последици за градот.
„Со месеци апелиравме дека ова може да се случи. Никогаш досега не било доведено во прашање целосното функционирање на градот,“ рече Кирков.
Тој нагласи дека без усвоен буџет, јавните претпријатија и градските установи нема да можат да работат. Кирков побара итна интервенција од Владата и останатите државни институции за да се реши кризата.
Град Скопје, пак, реагираше со соопштение во кое ги отфрла обвинувањата на ВМРО-ДПМНЕ, нарекувајќи ги лаги и манипулации.
„Предлог-буџетот се доставува до Советот седум дена пред расправата, согласно законот што важи за сите единици на локалната самоуправа. Ако следиме таа логика, тогаш и општините раководени од ВМРО-ДПМНЕ, кои сè уште немаат поднесено буџети за 2025 година, ќе останат во ‘мрак’. Предлог-буџетот на Град Скопје е развоен и инвестициски, и граѓаните не треба да наседнуваат на лаги,“ наведуваат градските власти.
Кризата со предлог-буџетот дополнително ги зголеми тензиите помеѓу локалната власт и Советот, со потенцијал за сериозни последици по функционирањето на главниот град.
