Од денешниот „Марш за ангелите“: Нема да се повлечеме и да се откажеме

„До кога ќе се одложува правдата? До кога ќе се одложува вистината?“, прашаа денес родителите на децата кои загинаа во пожарот во дискотеката „Пулс“ во Кочани на 16 март оваа година, на „Маршот на ангелите“.

Маршот започна во 14:05 часот со повик да се оди „со љубов, со болка и со достоинство – во име на оние кои повеќе не можат да чекорат“. Организаторите нагласија дека овој марш не е протест, туку мирна и достоинствена порака против неправдата и потсетник дека зад секој судски случај стојат човечки животи, семејства и бескрајна болка. Родителите јавно објавија дека нема да молчат и дека ќе продолжат да бараат фер судење за трагедијата во дискотеката „Пулс“, во која загинаа 63 млади луѓе.

„Второто одложено рочиште не беше само административно одложување. Тоа беше уште еден удар за 63 семејства. Уште една пауза што ја продлабочува нашата болка. Уште една пречка на патот кон правдата. Но, и уште еден доказ дека: Нема да се предадеме! Нема да се повлечеме. Нема да се откажеме! Многу јасно кажуваме: чекаме обвинение против полицајците. Чекаме одговор на прашањето: Кој и зошто не реагирал навреме? Кој не ја исполнил својата службена должност? Зошто, според наводите што ги слушаме, му била одбиена помош кога можело да се спасат човечки животи?“, беше истакнато денеска во Кочани.

Судењето за трагедијата во дискотеката „Пулс“ во Кочани, во која загинаа 63 лица, а околу 200 беа повредени, започна на 19 ноември. Во случајот се опфатени 38 обвинети – 35 лица и три компании. Следното рочиште е закажано за 2 декември.