Општина Струмица: Недостигот на кадар сериозно го загрозува функционирањето на градинките

Општина Струмица соопшти дека детските градинки во градот се соочуваат со сериозен недостаток на стручни лица, воспитувачи, негуватели и технички персонал, што ја отежнува нивната основна функција.

Според општината, иако до надлежните институции биле испратени повеќе барања за нови вработувања, до денес нема добиено конкретен одговор, а едно од барањата било одбиено. Од општината посочуваат дека и покрај тоа што во буџетот за 2025 година се предвидени средства за нови вработувања, Владата досега не презела мерки за решавање на проблемот.

Во соопштението се истакнува дека детската градинка „Виножито“, која има капацитет за 300 деца, во моментов згрижува 387, додека 40 деца се на листа на чекање. За нормално функционирање, неопходни се дополнителни 10 воспитувачи, негуватели и тројца технички работници. Исто така, градинката „Детска радост“ има потреба од 14 нови вработувања, но, како што наведува општината, Министерството за финансии сè уште не дало одобрување за нив.

Дополнителен предизвик претставува и застојот во процесот на лиценцирање на кадарот, кој, според соопштението, не е деблокиран од 2024 година, откако Министерството за труд и социјална политика го презеде технички министер. Поради ова, веќе 15 месеци не се организирани испити за лиценцирање, што ја отежнува можноста за вработување нови стручни лица.

„Општина Струмица апелира до надлежните институции итно да преземат мерки за решавање на проблемот, со цел да се обезбедат соодветни услови за згрижување и воспитување на најмладите“, се наведува во соопштението.

Градоначалникот на Струмица, Костадин Костадинов, апелира Владата да не ги игнорира барањата за подобрување на условите во градинките.

„Не можеме да останеме пасивни додека институциите не реагираат на проблемите што ги загрозуваат нашите деца. Принудени сме да бараме решенија по секоја цена, бидејќи секое дете заслужува квалитетно воспитание и грижа“, изјави Костадинов.

Граѓаните на Струмица најавуваат дека нема да дозволат ова прашање да остане нерешено и бараат итна интервенција од Владата за обезбедување на неопходниот кадар во градинките.