Skip to content
Министерот за надворешни работи Бујар Османи испрати писмо до пратениците во македонското Собрание во пресрет на утрешната седница на којашто започнува дискусија по која ќе следи гласање за второто најважно прашање кое било кој парламентарен состав требал да ги донесе во историјата на земјата по независноста – по зачленувањето во НАТО, остварување на втората стратегиска цел на државата за приклучување кон напредното Европско семејство на држави.
„Во петок Вие ќе одлучувате за европската иднина на Северна Македонија, определба за која работиме и работеа сите Влади во изминатите 30 години. Од Вас ќе зависи дали со прифаќање на промената на Уставот ќе ги продолжиме разговорите по поглавјата за членство во Унијата или ќе запреме во преговорите на подолг рок, до некоја нова шанса, без никаква гаранција за успех, поттикнувајќи го процесот на „пасошизација“ на граѓаните кои бараат европска иднина за себе“, пишува во писмото министерот за надворешни работи.
Османи во обраќањето до пратениците вели „верувам и знам дека секој од вас сака да бидеме членка на Унијата составена од најдемократски и најбогати земји во светот која гарантира мир, демократски развој и економски просперитет“.
„Во процесот на преговорите имавме за цел да го зачуваме и зајакнеме македонскиот јазик и македонскиот национален идентитет. Одговорно тврдам дека во тоа успеавме. Македонскиот јазик за прв пат беше прифатен и гласан во Советот на ЕУ помеѓу земјите членки и е недвосмислено дел од европските јазици. Овој факт не може никој да го побие“, истакнува Османи во писмото до пратениците.
Министерот Османи уште дополнува дека „ги разбира сите оние што стравуваат од можностите за натамошни обиди за негирање и наметнување нови билатерални услови“.
Тој е категоричен дека „дека историските и идентитетските прашања не се дел од патоказите и одредниците од кои зависи отворањето и затворањето на поглавјата“.
„Со оваа промена на Уставот, ние само ќе ја зајакнеме нашата меѓународна положба и ќе ја зголемиме меѓународната поддршка за нашите цели. Низ преговорите, шансите да продолжиме да ја промовираме и унапредуваме македонската национална посебност, историја и култура ќе бидат значително подобри и зајакнати“, пишува Османи во писмото до пратениците во Собранието.
„Секој човек и политичар би бил среќен да биде запаметен од историјата дека постапил правилно кога било најважно“, нагласува министерот за надворешни работи, и дополнува дека сега е време да се биде на вистинската страна и без колебање да се донесе одлука со која земјата ќе оди напред, а луѓето во неа ќе живеат подобро.
„Јас лично не се сомневам дека со оваа промена на Уставот ќе направиме било каква грешка, напротив ќе отвориме ново поглавје на развој и стабилност за нашите граѓани“, посочува Османи.
Во писмото до пратениците Османи вели дека „оваа промена не менува ништо во положбата на Бугарите во земјава и во однос на правата што до сега ги имаа и им ги гарантираше Уставот“.
„Оваа промена ни дава можност на Република Бугарија и на светот да им докажеме дека тие не се дискриминирани, бидејќи реално тоа е така. Ова е можност да ги одземеме сите аргументи, а потоа да се втурнеме брзо кон реформските процеси кои се најважни за нашите граѓани и во наш најдобар интерес“, истакнува министерот за надворешни работи.
Со промената на Уставот, ќе стане јасно дека покрај македонскиот народ во земјава живее и дел од бугарскиот народ, кој е различен, пишува Османи, ио додава дека „ова не го правиме под диктат на Бугарија, ниту заради уцена од нејзина страна“.
„Ова е компромис во преговорите откако нивниот меморандум до ЕУ за непризнавање на македонскиот јазик и нација не доби поддршка од земјите членки. Компромис со кој го заштитивме македонскиот јазик и идентитет“, се вели во писмото на министерот за надворешни работи Бујар Османи до пратениците во македонското Собрание во пресрет на утрешната седница на којашто започнува дискусијата и постапката за уставните измени.
