Парното поскапува: Новите цени започнуваат од утре

Регулаторната комисија за енергетика, водни услуги и комунални услуги на Република Северна Македонија (РКЕ) донесе одлука со која од 1 март цената на топлинската енергија за потрошувачите на ЕСМ Енергетика (5,17%) и Скопје Север – Енерџи Еко Линк (5,25%) ќе се зголеми за околу 5%.

„Откако ја соопштивме цената за најголемиот систем преку кој се снабдуваат над 95% од домаќинствата со парно, најавивме дека овие две компании поднесоа барање за корекција на цената. Зголемувањето на цената на природниот гас на светските берзи, особено во последниот квартал на минатата година, со раст од 16%, е главната причина за оваа одлука. По разгледувањето на нивното барање, РКЕ изврши соодветни анализи и донесе одлуки за корекција на цените за потрошувачите на топлинска енергија од ЕСМ Енергетика и Скопје Север – Енерџи Еко Линк, што ќе стапи на сила од 1 март. Вкупно, за оваа корекција ќе бидат погодени околу 2.500 потрошувачи“, изјави Марко Бислимоски.

Во исто време, РКЕ ја информираше јавноста дека е донесена одлука за издавање две лиценци за енергетска дејност, за регулирано производство и снабдување со топлинска енергија на ЕНЕРЏИ ЕКОЛИНК АД Скопје, додека постапката за лиценца за дистрибуција е во тек.

„Станува збор за топланата позната како Скопје Север, која неодамна беше преземена од приватен инвеститор. Инвеститорот започна постапка за конечна лиценца за компанијата која веќе повеќе од 20 години врши јавна дејност. РКЕ продолжува да ја поддржува реализацијата на инвестиции кои го подобруваат квалитетот на снабдувањето и проширувањето на мрежата, што ќе резултира со зголемување на бројот на потрошувачи. Овој систем за затоплување е еколошки најприфатлив и најекономичен, што се одразува на пониските сметки за парно. Ако сите оние кои моментално не се приклучени на системот повторно се вклучат, сметките за парно ќе се намалат за околу 10%“, изјави Бислимоски.