Skip to content
Министерката за одбрана Славјанка Петровска и вицепремирот за економски прашања Фатмир Битиќи денеска беа во посета на домашните капацитети за производство на воена опрема и вооружување во фабриката за наменско производство на „АТС Груп“, односно во поранешната фабрика Сувенир – Самоков.
За време на посетата, министерката Петровска и вицепремиерот Битиќи ја споделиле можноста за домашните компании да учествуваат на НАТО тендерите за набавки, процес во кој Центарот за поддршка на компании во Министерството за одбрана е подготвено да даде поддршка.
– Ова е една од големите придобивки за нашите компании и економијата целокупно од влезот на нашата земја во НАТО. Ова е голем пазар со огромен потенцијал, рекол Битиќи, пренесе владината прес-служба.
Петровска и Битиќи при посетата имале можност и одблизу да се запознаат со производствениот процес во оваа компанија.
– Живееме во период кога потпирањето само на светските токови на снабдување со критични материјали и услуги станува ризично. Производството на стоки и услуги кои се од одбранбен карактер дома, во нашата држава е од исклучително значење и за безбедноста на Северна Македонија, но и за колективната безбедност во НАТО, нагласила министерката Петровска.
Целта на оваа посета, се посочува во соопштението од Владата, е да се разгледаат можностите за продлабочување на соработката помеѓу државата и воено-наменската индустрија, односно стопанските субјекти кои се занимаваат со производство и промет со стоки поврзани со одбранбени дејности во Северна Македонија, како и поддршка на субјектите кои се потенцијални даватели на стоки и услуги од одбранбен карактер.
АТС груп е голема компанија која има 550 вработени, од кои 350 вработени се во фабриката за производство на муниција. Во моментот компанијата спроведува постапка за вработување на дополнителни 80 лица. Во поглед на инвестициите на компанија, вкупни нови инвестиции се 202 милиони евра, а само за малокалибарска муниција и каписли новата инвестиција е во вредност од околу 50 милиони евра.
