Почина тинејџерот кој со мотоцикл удри во џипот на пратеник од Левица

Шеснаесетгодишното момче од Идризово, кое на 14 септември се здоби со тешки повреди во сообраќајна несреќа во село Марино, општина Илинден, им подлегна на повредите – потврди неговото семејство за Канал 5.

Несреќата се случила кога мопедот управуван од тинејџерот се судрил со возило „Хјундаи Тусон“ со гевгелиски регистарски ознаки, управувано од 36-годишниот Сашко Јанчев, пратеник од партијата Левица. Во мопедот се возела и 13-годишна сопатничка од Илинден, која исто така била повредена.

Двете деца биле пренесени во комплексот клиники „Мајка Тереза“ со тешки телесни повреди, додека возачот и неговиот сопатник, 25-годишен маж од Вевчани, добиле полесни повреди и биле згрижени во Градската општа болница „Св. Наум Охридски“.

Полицијата извршила увид на местото на несреќата, а по наредба на јавен обвинител, околу 4 часот утрото возачот С.Ј. бил приведен. Против него се води постапка за „загрозување на безбедноста на сообраќајот“ и „тешки дела против безбедноста на луѓето и имотот во сообраќајот“, согласно Кривичниот законик.

Од партијата Левица соопштија дека Јанчев не бил под дејство на алкохол и не возел над дозволената брзина, наведувајќи дека мопедот директно се забил во вратата на неговото возило.