Последен поздрав за загинатите од Кочани – Поворката полека се упатува кон градските гробишта

Поворката од роднини, пријатели и возилата со кои се пренесуваат телата на загинатите од Кочани полека се приближува кон градските гробишта. Сите улици во Кочани се исполнети со луѓе кои се упатени кон гробиштата за да им оддадат последна почит на загинатите. Во рацете држат цвеќиња, со празни погледи и солзи во очите.

Поворката ја предводат млади луѓе кои држат фотографии од дел од загинатите во трагичниот пожар. По нив следат погребните возила со телата на жртвите.

За време на целата церемонија, присутно е засилено полициско обезбедување заради безбедноста на настанот, а гробиштата ги надлетува хеликоптер. Сѐ се одвива мирно и достојно, со ред, иако новинарските екипи повеќе се концентрирани на главниот пат, каде што има поголема можност за снимање на поворката. Во близина на гробиштата, како што беа повикани од надлежните, новинарите скоро и да не се присутни.