Потребни се мерачи на загаден воздух и во училиштата и во градинките

Учениците во училиштата и децата во градинките во Македонија секојдневно се соочуваат со проблемот на загаден воздух, покажуваат податоците од студијата „Справување со загадувањето на воздухот,“ спроведена од УНДП и Министерството за животна средина. Според истражувањето, концентрациите на загадување во затворените простории се речиси идентични со надворешните во зимските месеци, а во летните може да бидат уште повисоки.

Во училиштата во Куманово, Гостивар, Струмица, Кавадарци и Струга, просечната концентрација на ПМ2.5 честички се движи од 40 до 80 микрограми на кубен метар, двојно повеќе од препораките на Светската здравствена организација.

„Потребни се итни мерки за обезбедување на здрави и безбедни услови за децата и наставниците,“ изјави проф. д-р Дејан Мираковски, кој препорачува инсталирање системи за вентилација и филтрација на воздухот за да се намали загадувањето до 80%.
Иако некои општини набавуваат прочистувачи за воздух, динамиката е бавна. Од невладината организација „О2 Иницијатива“ велат дека, покрај филтрите, е неопходно поставување системи за мерење на квалитетот на воздухот.

Според УНИЦЕФ, аерозагадувањето во Македонија придонесува за 18% од вкупната смртност, а секој деветти смртен случај кај новороденчињата е директно поврзан со загаден воздух.

Активистите бараат стратегија и акциски план кој ќе адресира системски мерки, како намалување на емисиите од индустријата, промена на начинот на греење и зајакнување на инспекциските служби.

Аерозагадувањето ја чини државата до 1.8 милијарди долари годишно, што ја потенцира потребата за брзи и ефикасни решенија.