Потребни се реформи за трудовото законодавство кои ќе ги вклучат интересите и на работниците и на работодавачите

Трудовото законодавство е од витално значење за економијата и за постигнување економска ефикасност и добросостојба на населението како целина, а Законот за работни односи има значајна улога во обезбедувањето легислативна рамка за правични и ефикасни работни односи што треба да промовираат продуктивно пристојно вработување и социјален мир, порача денеска министерот за економија и труд Бесар Дурмиши.

Нагласи дека актуелниот Закон за работни односи датира од 2005 година и во меѓувреме се направени 28 измени и дополнувања.

– Многуте измени придонесоа за тешко следење на законот. Тој не ги следи брзите промени на пазарот на трудот, а детектирани се и многу одредби кои поради својата нејасност придонесуваат за правна несигурност. Затоа неминовни се реформи за трудовото законодавство кои ќе ги вклучат потребите и интересите и на работниците и на работодавачите кои ќе треба да бидат прифатени од двете страни, изјави Дурмиши пред почетокот на конференцијата „Реформа на Законот за работни односи – предизвици и насоки“.

Денеска, додаде, сакаме да ги слушнеме социјалните партнери, судиите, експертите и другите засегнати страни за да увидиме дали е подобро да одиме со измени на постојното законско решение или да продолжиме да работиме на текстот на нов закон кој се работи подолг период. Нагласи дека очекува отворена, одговорна и конструктивна дискусија и одлука која ќе биде во интерес на работодавачите и работниците.

-Оваа конференција е свикана за да се слушнат сите социјални партнери и работодавачите и синдикатите и работниците. Кава одлука ќе произлезе од конференцијата ние како Влада ќе ја спроведеме, посочи Дурмиши.

Во своето обраќање на конференцијата, пак, рече дека реформата не е само технички процес, туку одлука за насоката што треба да ја заземе пазарот на трудот во нашата земја.

-Не одлучуваме само за текст на закон, туку како сакаме да изгледа пазарот на трудот. Работниот однос не е само договор, туку жив однос што носи сигурност, достоинство и напредок, истакна Дурмиши.

Посочи дека современите предизвици бараат јасен правен систем – флексибилен за работодавачите, правичен за работниците и функционален за државата.

-Ниту една реформа не е лесна, но нема успех без храброст, партнерство и заедничка визија. Ова е наша заедничка можност да изградиме силна основа за идните генерации, нагласи Дурмиши.