Пристигнаа првите средства од Инструментот за реформи и раст од ЕУ за Северна Македонија

Северна Македонија доби првите средства во износ од 52,4 милиони евра од Инструментот за реформи и раст на Европската унија. Од вкупниот износ, 24,4 милиони евра се наменети за буџетска поддршка и веќе се уплатени на Министерството за финансии.

Министерот за европски прашања, Орхан Муртезани, информираше дека ова претфинасирање претставува седум проценти од вкупната финансиска поддршка од 750 милиони евра која е обезбедена за земјата. Оваа исплата е резултат на барањето за предфинансирање кое беше поднесено во ноември минатата година, а со ова Северна Македонија стана првата земја во регионот која ги доби средствата, откако ги заврши правните процедури и стапи во сила Договорот за заем и Договорот за грант.

Министерот Муртезани додаде дека на 14 март годинава земјата го доставила првото барање до Европската комисија за ослободување на дополнителни 17,1 милиони евра за имплементација на реформите до декември 2024 година, со продолжен рок до февруари 2025 година. Овие реформи вклучуваат усвојување на Закон за јавна внатрешна финансиска контрола, донесување на подзаконски акти од Законот за буџети, операционализација на структурите за праведна транзиција и измени во Законот за трговски друштва.

Од овие 17,1 милиони евра, 7,96 милиони евра се за буџетска поддршка, а останатите 9,11 милиони евра се за инвестициски проекти преку заедничкиот фонд на Инвестициската рамка за Западен Балкан.

Министерот истакна дека средствата ќе бидат достапни откако Европската комисија ќе заврши со оценката на исполнувањето на реформите, што ќе трае 90 работни дена. Од износот од 52,4 милиони евра, 24,4 милиони евра веќе се уплатени, 15 милиони се грант и се префрлени во Инвестицискиот фонд за Западен Балкан, а преостанатите 13 милиони евра се заем и се во процедура на исплата.