„Промени го крајот на нечија приказна”, филм за благородноста на органодарителството

Тим на проектот „Поддршка на системот за трансплантација“ утре, на 25 март, со почеток во 19.00 часот, во киното „Фросина“ во МКЦ во Скопје, премиерно ќе го прикаже документарниот филм „Промени го крајот на нечија приказна”.

Филмот е реализиран во рамките на проектот „Поддршка на системот за трансплантација” финансиран од Европската Унија.

Документарниот филм, во продукција на „Види вака“ ги следи животните приказни на пациенти, донори и медицински професионалци кои се дел од системот за трансплантација во Северна Македонија, прикажувајќи ги предизвиците и успесите во оваа важна област на медицината.

Филмот има за цел да ја афирмира важноста на органодонорството и трансплантацијата како едни од најблагородните чинови на солидарност и хуманост. Во нашата држава, како и во светот, илјадници пациенти чекаат за трансплантација која буквално значи втора шанса за живот. Секој донор може да спаси до осум животи и да го подобри квалитетот на живот на многу повеќе луѓе.

Системот за трансплантација во Северна Македонија бележи континуиран напредок, но сè уште се соочува со предизвици во поглед на свеста за донирање органи.

Самиот проект „Поддршка на системот за трансплантација“ направи позитивни поместувања во системот, а овој филм е од клучно значење за едукација на јавноста и разбивање на стереотипите поврзани со органодонорството.