Промоција на книгата „Скопје 20214… и потоа“ од Златко Теодосиевски

Во Културно информативниот центар – Скопје денеска ќе се одржи промоција на книгата „Скопје 20214… и потоа“ од Златко Теодосиевски. 
 
Како што најавија од ЈУ Културно информативниотн центар – Скопје, за книгата  ќе зборуваат Никос Чаусидис и Бранко Героски.

Златко Теодосиевски е историчар на уметност, критичар и публицист, автор е на повеќе книги од областа на ликовната уметност и културата („Илија Кочовски – сликар на тишината“, „Жарко Јакимовски, монографија“, „Сашо Саздовски, монографија“, „Пандора Саздовска, монографија“„(Само)заробена култура“, „Време на изгубени илузии“, „Пролегомена за македонската фотографија, том 1-4 и др.)

– Во 2024 година се навршија полни десет години од „проектот“ со славно име „Скопје 2014“, а изминуваат безмалку еднакво толку години и од времето на т.н. „Шарена револуција“ којашто, меѓу  другото, инсистираше  на конечна  разврска со овој  „проект“, особено заради неговата анахроност, хаотичност, криминогеност, противзаконска позадина, неговата анти-историчност и квазиестетичност итн.  Спомнатите години едновремено  сведочат и  на приближно толку  долгиот  период од  ветувањата на една политичка партија дека го разбира народниот гнев против „Скопје 2014“ и дека дефинитивно ќе расчисти со „проектот“, се наведува во соопштението.

Промоцијата ќе биде проследена со фотографии од „Скопје 2014“ од Александар Кондев.