Првиот квартал со прилив од над 319 милиони евра бил најдобар за странски инвестиции годинава

Во текот на третиот квартал од 2024 година, вкупните директни инвестиции во Македонија достигнаа нето-приливи од 281,6 милиони евра. Овој раст е поттикнат од зголемените приливи во меѓукомпанискиот долг (219,5 милиони евра), сопственичкиот капитал (39,9 милиони евра) и реинвестираната добивка (22,2 милиона евра), соопшти Народната банка.

Споредбено со вториот квартал, кога приливите изнесуваа 237,48 милиони евра, третиот квартал покажува подобрување. Сепак, тој заостанува зад првиот квартал од годината, кога беа реализирани рекордни 319,1 милиони евра. Интересно е што овој висок резултат од почетокот на годината се совпаѓа со периодот непосредно пред парламентарните и претседателските избори, при што дури 237,56 милиони евра биле врз основа на сопственички капитал и реинвестирање.

За деветте месеци од 2024 година, вкупните странски директни инвестиции изнесуваат 838,21 милион евра. Оваа сума е највисока споредена со претходните години, покажуваат податоците од Народната банка. Од 2023 година наваму, не постои друга година кога толкав прилив е постигнат дури за целата година.

До крајот на 2023 година, состојбата на директни инвестиции достигна 7,5 милијарди евра, што претставува 55,2% од БДП. Од оваа сума, 5,2 милијарди евра се вложувања во сопственички капитал, а 2,3 милијарди евра се вложени во должнички инструменти.

Анализирано по земји, најголем инвеститор е Австрија со 1,2 милијарди евра, следена од Грција (751 милион евра), Турција (715 милиони евра), Германија (652 милиони евра) и Холандија (597 милиони евра). Овие пет земји учествуваат со 51,9% од вкупните директни инвестиции.

Според дејностите, 33% од вкупните инвестиции се насочени кон производство (2,5 милијарди евра), додека 22,9% (1,7 милијарди евра) се инвестирани во финансиски и осигурителни активности.