Сакаме правда – Студенти упаднаа во градското Собрание во Ниш

Група студенти кои протестираат денес влегоа во градското Собрание во Ниш, каде министерката за образование Славица Ѓукиќ Дејановиќ ја отвори јавната расправа за четири предлог-закони за образованието. Станува збор за прва јавна расправа во рамки на најавените измени во образовниот систем, која беше прекината од студенти кои скандираа: „Сакаме правда“ и „Студентите не молчат“.

Протестите започнаа како реакција на трагедијата на железничката станица во Нови Сад на 1 ноември, каде животот го загубија 15 лица, а две беа тешко повредени по уривањето на бетонска настрешница. Универзитетите во Ниш, Белград и Нови Сад, како и неколку средни училишта, се во блокада.

Студентите бараат објавување целосна документација за реконструкцијата на железничката станица за утврдување политичка и кривична одговорност како и кривична одговорност за напаѓачите на демонстрантите кои протестираа по несреќата. Тие бараат и ослободување на уапсените активисти и стопирање на кривичните постапки против нив.

И покрај изјавите од надлежните дека документите се објавени и барањата се исполнети, студентите не се согласуваат. Тие тврдат дека доставената документација е нецелосна и дека нивните повици за правда и одговорност остануваат игнорирани.Студентските организации најавуваат дека протестите ќе продолжат, со цел да се изврши притисок врз властите да преземат конкретни чекори за исполнување на нивните барања.

Овие настани го вклучуваат алармот за целокупната состојба во образованието и недостатокот на транспарентност и одговорност во институциите во Србија.