Skip to content
Силен земјотрес со јачина од 5,1 степен беше регистриран утрово во морскиот дел меѓу грчките острови Санторини и Аморгос, само неколку минути по потрес од 4,2 степени. Во текот на ноќта беа забележани уште два земјотреси од 4,2 и 4,5 степени, пренесува МИА од Атина.
Најсилниот потрес во ова подрачје се случи минатиот понеделник, со јачина од 5,3 степени според Рихтер. Според податоците на Атинскиот универзитет, од 26 јануари до 14 февруари се регистрирани над 19.200 земјотреси, од кои повеќе од 16.900 биле посилни од 1 степен.
Поради зголемената сеизмичка активност, училиштата на Санторини, Иос, Аморгос и Анафи остануваат затворени трета седмица по ред. Грчкото Министерство за цивилна заштита ја следи состојбата, а експертите утврдиле дека потресите се резултат на подморски раседи, додека вулканската активност на Санторини останува стабилна.
Граѓаните се повикани да избегнуваат престој во напуштени згради и пристаништа, да ги отстранат опасните предмети од објектите и да бидат внимателни на патиштата каде што постои ризик од одрони. Во случај на силен земјотрес, итна евакуација на крајбрежните зони е задолжителна.
Нов состанок на надлежните комисии е закажан за среда, додека грчкиот премиер Кирјакос Мицотакис изјави дека оваа појава е без преседан и научниците сè уште не можат да ја проценат нејзината натамошна динамика.
