Секој поединец треба да преземе одговорност и активно да работи на заштита на човековите права

На денешната промоција на едукативната видеоигра за човековите права „Навигатор“, во присуство на претставниците на Европската Унија и Обединетите нации во земјава, Михалис Рокас и Рита Колумбија, беше нагласена важноста од подигнување на свеста за човековите права и нивното постојано унапредување, особено за најранливите во општеството.

Евроамбасадорот Рокас истакна дека човековите права не треба да се земат здраво за готово и дека мора континуирано да работиме на нив. Тој апелираше на постојаната заштита на правата, потсетувајќи дека многу луѓе секојдневно страдаат од нивно прекршување. Притоа, истакна дека Универзалната декларација на човековите права и почетокот на Европската Унија ја претставуваат иста цел: свет во мир со просперитет за сите, со заштита на најранливите.

Рокас ги истакна и тешките состојби со кои се соочуваат луѓето во диктаторски и авторитарни режими, како и потребата од поголема свест за родово базираното насилство и неговото елиминирање. Тој ја нагласи важноста од усвојување на соодветни механизми за поддршка на жртвите и постигнување на родова еднаквост што побрзо.

Рита Колумбија, постојан координатор на Обединетите нации во Северна Македонија, ја истакна важноста на Денот на човековите права, како темел на Обединетите нации. Таа ги потсети присутните на усвојувањето на Универзалната декларација на човековите права на 10 декември 1948 година, како значаен чекор кон мирни и демократски општества. Колумбија апелираше дека човековите права не смеат да се заборават, туку треба секојдневно да се практикуваат и уживаат. Порача дека секој поединец треба да преземе одговорност и активно да работи на заштита на човековите права, наместо само да чека од другите да ја носат таа одговорност.