Skip to content
Основното јавно обвинителство – Скопје отвори постапка против 36-годишен хрватски државјанин, осомничен за кривично дело „Телесна повреда“ по член 130 став 2 во врска со став 1 од Кривичниот законик, поради жестоко насилство врз неговата сопруга во семејниот дом во Скопје.
Инцидентот започнал како вербална расправија, која прераснала во физички напад. Обвинителството информира дека осомничениот ја удирал сопругата со тупаници и шлаканици по главата и телото, а потоа силно ја притискал за вратот, свесен дека таа е во петтиот месец од бременоста. Насилството кулминирало кога ја фрлил на креветот и ја удрил со главата од ивицата, прекинувајќи дури кога жената почнала да крвари.
Жртвата успеала да се засолни во тоалетот и да повика полиција и брза помош. Медицинскиот преглед потврдил бројни повреди на главата, како и оштетување на плацентата во која се наоѓал плодот.
Јавниот обвинител предложи на осомничениот да му биде изречена мерка притвор.
Истовремено, Министерството за внатрешни работи соопшти дека истиот ден, на 28 август околу 16:30 часот, полициски службеници на Граничниот премин Долно Блаце го уапсиле Т.К. (36) од Хрватска. При проверка било утврдено дека за него е распишана мерка „апси“ по барање на СВР Скопје, откако неколку часа претходно, околу 9 часот, физички ја нападнал неговата 38-годишна сопруга во нивниот дом на подрачјето на Центар.
