Лошо е што не се знае колку време ќе трае поправката – Скопјани масовно полнат вода пред најавениот прекин

Најавата за прекин на водоснабдувањето во Скопје од утре вечер предизвика масовно купување вода во маркетите и правење залихи дома. ЈП „Водовод и канализација“ информираше дека поголем дел од градот ќе остане без вода поради санација на главниот цевковод.

Во маркетите, рафтовите со вода брзо се празнат, а продавачите сведочат за огромна побарувачка.

„Како што ја ставаме на рафт, така се распродава,“ изјави продавачка од маркет во Ѓорче Петров.

Дел од граѓаните, пак, изразуваат загриженост поради недостатокот на информации за времетраењето на прекинот.

„Полниме колку што можеме, но никој не кажува дали ќе трае еден ден или подолго,“ вели загрижен жител на општина Центар.

Најавениот прекин ќе ги зафати речиси сите скопски населби, освен Чаир, Бутел, Ѓорче Петров и Топанско Поле. Причината е санација на главниот цевковод Ф-1600 и замена на застарени затворачи, што треба да ја подобри ефикасноста и притисокот во водоводната мрежа.

Градоначалничката Данела Арсовска уверува дека дефектот ќе биде саниран за 24 часа.

„Техничките екипи се подготвени и ќе ја завршат работата во најкраток рок. Ова е дел од долгорочната стратегија за подобрување на градскиот водовод,“ изјави Арсовска.

И покрај уверувањата, граѓаните остануваат претпазливи, подготвувајќи се за можноста прекинот да трае подолго од најавеното.