Скопје шести најзагаден град во светот, прв во Европа

Според податоците од платформата „IQAir“, Скопје утрово е на првото место по загаденост во Европа. На глобалната листа за квалитет на воздух, нашиот главен град е шести, веднаш зад Делхи, Лахор, Акра, Дака и Кабул.

Индексот на загаденост во Скопје достигна 178, што е висока вредност. Меѓу европските градови, најблиску до оваа позиција е Приштина, која е рангирана на 27. место во светот со индекс од 111.

Светската банка предупредува дека секоја година околу 2.800 жители на Македонија умираат како последица на загадениот воздух. Особено погодени се граѓаните на Скопје и Тетово, кои се изложени на значително повисоки концентрации на ПМ 2,5 честички во споредба со земјите од Западна Европа.

Зимската сезона дополнително го влошува овој проблем. Присуството на ПМ честички е забележливо не само надвор, туку и во затворените простории. Главни извори на загадувањето остануваат согорувањето дрва, прашината од градежни активности и улиците, горењето отпад и користењето на нафта и мазут за загревање на јавните објекти.