Skip to content
Бројот на заболени од грип во Македонија продолжува да расте, при што во петтата недела од 2025 година се пријавени 3.036 нови случаи. Тоа претставува зголемување од 61,7 отсто во однос на претходната недела, покажува најновиот извештај на Институтот за јавно здравје (ИЈЗ).
Споредбата со минатогодишната сезона на грип покажува уште подраматично зголемување. Бројот на пријавени случаи оваа недела е за 83,7% поголем од истиот период минатата сезона, што укажува на посилен бран на инфекции, објави Мета.мк
Грипот ги зафати сите возрасни групи, но податоците покажуваат дека најголем број случаи – 1.650 – се кај лицата на возраст од 15 до 64 години. Децата се исто така значително погодени, со 720 случаи кај оние на возраст од 5 до 14 години, додека 412 случаи се регистрирани кај деца под 4 години. Постарите лица и понатаму се изложени на ризик, со 254 случаи пријавени кај лица над 65 години.
Највисока стапка на инциденца (426,9 на 100.000 луѓе) е забележана кај децата на возраст под четири години, што ги прави најранливата група во оваа сезона на грип.
Изминатава недела беа пријавени два смртни случаи поврзани со грип. Жрвите на возраст од 59 и 77 години биле од Скопје и Свети Николе и биле хоспитализирани на Клиниката за инфективни болести во Скопје и на Клиничката болница во Штип. Двете лица имале основни здравствени состојби и не биле вакцинирани против сезонски грип.
Бидејќи случаите на грип продолжуваат да растат, здравствените власти ги повикуваат високоризичните групи – особено постарите и оние со хронични заболувања – да се вакцинираат за да спречат тешки компликации.
