Skip to content
Заклучно со вчера, 19 јули 2025 година во 22:30 часот, на територијата на државата беа регистрирани вкупно 27 пожари на отворен простор. Од нив, четири се уште се активни, пет се ставени под контрола, а осумнаесет се целосно изгаснати.
Најкритични остануваат четирите активни жаришта. Во општина Василево, кај селото Нивичино, гори нискостеблеста шума со смрека, грмушки и сува трева. Во општина Македонски Брод пожарот кај селото Грешница зафати мешана шума и ниска вегетација, додека реактивираното огнено гнездо меѓу селата Црешнево, Локвица и Крапа го зафати деградираниот дабов појас. Четвртото жариште се наоѓа во општина Прилеп, на потегот меѓу селата Царевиќ и Смолани, каде што гори мешана шума и ниска вегетација.
Екипите на Територијалните противпожарни единици, Армијата и шумската полиција остануваат на терен во текот на ноќта, а по потреба ќе биде активирана и воздушната поддршка со првите утрински часови. Надлежните упатуваат апел до граѓаните целосно да се воздржат од палење отпад и растителни остатоци на отворено и да пријават секоја појава на чад или оган на бесплатниот број 193 или во најблиската полициска станица.
Иако повеќето од вчерашните пожари се изгаснати, властите предупредуваат дека високите температури и сувиот ветер денес може повторно да предизвикаат реактивирање на жариштата, особено на планинскиот и ридскиот терен во западниот и југоисточниот дел од земјата.
Надлежните институции најавуваат нов пресек на состојбата во текот на денот, а јавноста ќе биде навремено информирана за сите промени.
