ССМ бара минимална плата од 500 евра, со субвенционирани придонеси од државата

Синдикатите ги изменуваат своите барања за минималната плата, поставувајќи цел од 500 евра, наместо досегашните 450 евра за кои притискаа речиси една година. Очекувањето е дека минималната плата ќе се зголеми на 24.500 денари од идниот месец, но ССМ предлагаат таа да биде 30.500 денари. За разликата од 6.000 денари, предлагат работодавачите да бидат ослободени од придонеси, со субвенција од државата за 12 месеци.

Овој предлог наскоро ќе биде доставен до Владата и Собранието, а според ССМ, бизнисот во голем дел го поддржува зголемувањето на минималната плата. Премиерот Мицкоски, пак, посочува дека Владата ќе ја поддржи договорената сума меѓу работниците и работодавачите, но ако нема договор, ќе се придржуваат кон законот.

Дискусиите за минималната плата се очекува да продолжат во новиот економско-социјален совет, кој би се одржал во март. Владата сѐ уште не ја формирала Комисијата која треба да ја потврди репрезентативноста на ССМ, што е неопходно за да се одржи средбата со работодавачите и синдикатите.

Тема за дебата ќе биде и пресметката на потрошувачката кошничка, која предизвика контроверзи, особено откако премиерот и министерката за финансии го доведоа во прашање вклучувањето на одредени производи, како грашок во конзерва и прекумерната потрошувачка на млеко.