Skip to content
Сојузот на синдикати на Македонија (ССМ) денеска ќе поднесе предлог за зголемување на минималната плата на 500 евра, барајќи и Владата да субвенционира придонеси за платите до 30.000 денари. Од Владата, пак, порачуваат дека решението треба да го договорат синдикатите и работодавачите, но субвенционирањето на придонесите не е дел од нивната агенда.
Според законското усогласување, минималната плата овој месец треба да се зголеми на околу 24.400 денари, што ССМ го смета за недоволно. Работодавачите се согласуваат за повисок минималец, но бараат поддршка од Владата за покривање на придонесите.
Прашањето ќе се разгледува на седницата на Економско-социјалниот совет, која се очекува кон средината на месецот. Министерката за финансии Гордана Димитриевска-Кочоска изјави дека Владата нема ништо против ако работодавачите можат да исплатат повисока плата, но нема намера да ги субвенционира придонесите.
Во меѓувреме, опозициската СДСМ ја поддржа иницијативата за минимална плата од 500 евра, тврдејќи дека зголемувањето ќе поттикне раст на сите плати и ќе помогне во подобрување на животниот стандард.
Ако не се постигне договор, минималната плата ќе биде усогласена според законските параметри – 50% од порастот на трошоците за живот и 50% од порастот на просечната нето плата во 2024 година.
