Уапсени четири лица поврзани со тероризам во Струга и Гостивар

Четири лица за кои постои основано сомнение дека планирале терористички активности, се уапсени утринава во полициска акција во Струга и Гостивар, потврди министерот за внатрешни работи, Панче Тошковски.

Министерот изјави дека станува збор за членови на терористички организации кои дејствувале во координација со лица од странство. Според него, осомничените биле следени подолг временски период од безбедносните служби, а акцијата била спроведена во соработка со меѓународни партнери.

„Обезбедивме значајни докази кои укажуваат на намери за организирање настани што би ја загрозиле безбедноста на Македонија и други држави. Целта на овие лица била индоктринација на други поединци од Балканот за остварување на нивните екстремистички цели,“ изјави Тошковски.

Сите четворица се македонски државјани и ќе бидат изведени пред судија во текот на денот.

„Кривичното дело за кое се товарат е терористичка организација. Имаме сомневања дека осомничените се поврзани со екстремистички и религиозни групи,“ додаде министерот.

Акцијата е уште еден пример за решителноста на македонските власти да спречат терористички закани и да обезбедат безбедност за граѓаните.