Унгарскиот кредит е скап, државата ќе плати 240 милиони евра само за камата

За заемот од 500 милиони евра од Унгарија, кој се распредели на половина меѓу општините и компаниите државата односно граѓаните ќе мора да платат 240 милиони евра камата на унгарската Експорт-импорт банка во текот на 15 години.

Македонија склучи договор со Унгарија за заем од 500 милиони евра, со каматна стапка од 3,25% и рок на отплата од 15 години, вклучувајќи тригодишен грејс период. Само за една година покрај ратата, земјава ќе плаќа околу 16 милиони евра за камата, што за 15 години ќе достигне 240 милиони евра.

Владата денеска ги одобри договорите за користење на средствата од унгарската кредитна линија наменети за бизнис секторот. Со ова, Развојната банка на Северна Македонија може да ги потпише договорите со комерцијалните банки, што значи дека средствата сега стануваат оперативни. Каматната стапка е фиксна и изнесува 1,95%, без дополнителни надоместоци. Во проектот се вклучени сите 13 комерцијални банки во земјата.

Овој заем е наменет за поддршка на македонското стопанство, со посебен фокус на зелени инвестиции и модернизација на производствените капацитети, но и изградба на трговски центри. Иако сите компании можат да аплицираат, приоритет ќе имаат производствените претпријатија. Министерката Димитриеска-Кочоска нагласи дека банките веќе имаат подготвени пласмани за одобрени проекти, кои чекаат потпишување на документацијата.

Премиерот Христијан Мицкоски ги отфрли сомнежите за можни злоупотреби, велејќи дека нема да има тргување со влијание.