Вардариште повторно гори – граѓаните блокираат, институциите молчат

Скопјани повторно се соочуваат со чад и загадување откако избувна нов пожар на старата депонија Вардариште, лоцирана во непосредна близина на густо населениот дел од градот. Жителите на општина Аеродром, револтирани од постојаното игнорирање на проблемот, веќе трет ден ја блокираат депонијата, барајќи итна реакција и трајно затворање на локацијата.

И покрај нивните напори, институционалниот одговор изостанува. Во меѓувреме, токсичниот чад што се шири од запалените отпадоци продолжува да ја загадува животната средина и да го загрозува здравјето на граѓаните.

„Ова не е првпат Вардариште да се самозапали, но еве, пак сме оставени сами на себе“, велат жителите кои учествуваат во протестите.

Од Аеродром порачуваат дека нема да запрат со блокадите сè додека не се донесе долгорочно решение и депонијата не биде конечно затворена и исчистена. Тие бараат ангажман и отчетност од градските и државните власти, посочувајќи дека здравјето на граѓаните не смее да биде ставено во втор план.