[Видео] Триатлонот ги инспирира девојките дека имаат сила за истрајност, посветеност и лидерство

Македонската триатлон федерација го претстави своето ново инспиративно видео, кое ја истакнува важноста и улогата на жените во триатлонот – од спортистки и судијки до тренерки и раководни фигури.

Ова видео ја слави нивната сила, истрајност, посветеност и лидерство, со цел да ги мотивира поголем број на девојки и жени да станат дел од триатлонската заедница.

Триатлонот е уникатен предизвик кој бара физичка издржливост и ментална сила, но истовремено нуди и извонредна можност за личен раст и постигнување.

„Триатлонот е повеќе од спорт – тој е простор за развој, лидерство и инспирација. Со ова видео, сакаме да ги охрабриме девојките и жените да ја препознаат својата моќ и да станат активен дел од нашата заедница“ – велат од Македонската триатлон федерација.

Федерацијата, исто така, истакнува дека жените и девојките се значително помалку застапени од мажите, што е дополнителна причина да им се даде заслужениот медиумски простор и да се поддржи нивната видливост и учество.

Погледнете го видеото и приклучете се – никогаш не е доцна за нов предизвик!

Ќе ви бидеме многу благодарни доколку го споделите видеото и придонесете кон поддршката на жените во триатлонот, а и спортот воопшто.

Видеото е реализирано со поддршка од Министерството за спорт.