Владата и општините да преземат мерки – Утре во Скопје протестен марш против загадениот воздух

Иницијативата „Зелен Хуман Град“ за утре најавува протестен марш против аерозагадувањето во главниот град.

Протестот започнува во 16:00 часот пред Министерството за животна средина и просторно планирање, продолжува пред Собранието и завршува пред Владата на Република Македонија.

„Секоја година во Македонија има околу 3.828 смртни случаи поради изложеност на честичките PM2.5, кои се меѓу најштетните за здравјето. Ова претставува 17,7% од вкупната смртност во државата. Честичките се поврзани со сериозни здравствени проблеми, како белодробни заболувања, срцеви удари и рак на белите дробови,“ се наведува во повикот од иницијативата.

Од „Зелен Хуман Град“ предупредуваат дека загадениот воздух е причина за еден од девет смртни случаи кај деца до една година. „Со години, загадувањето во Скопје и другите градови е проблем за сите нас. Неопходно е итно спроведување на ефективни мерки за подобрување на квалитетот на воздухот,“ порачуваат од иницијативата.

Организаторите повикуваат Владата, надлежните институции и општините да преземат итни и среднорочни мерки за справување со аерозагадувањето.

„Граѓаните нема да толерираат повеќе неодговорност за еден од најголемите проблеми со кои се соочуваме!“ апелираат од „Зелен Хуман Град“.