Во Белград цената за квадрат достигнува и до 5.000 евра

Владата на Србија усвои закон кој им овозможува на младите од 20 до 35 години да купат прва недвижност со само 1% учество. Оваа мерка отвори прашања за влијанието врз цените на становите и дали сега е вистинскиот момент за купување.

„Мерките ќе влијаат на ценовниот сегмент кој е опфатен – претежно станови до 100.000 евра, иако ќе важат и за оние кои можат да платат нешто повеќе, но разликата ќе ја покријат сами,“ изјави агентот за недвижности Немања Михајловиќ.

Михајловиќ објаснува дека може да се очекува зголемен интерес за станови во рамките на ценовниот опсег, што би можело да предизвика мало зголемување на цената по квадратен метар.

„Очекувано е да има зголемено интересирање за станови до 100.000 евра, што веројатно ќе доведе до благ пораст на цените,“ вели тој, додавајќи дека мерката е во почетна фаза и остануваат детали за разработка.

Според Михајловиќ, пад на цените може да се очекува кога пазарот ќе се засити, но тоа зависи од фактори како инфлацијата и растот на цените на градежните материјали.

„Иако заситеноста на пазарот може да доведе до пад на цените, инфлацијата и трошоците за материјали го прават тоа релативно. Реален пад може да се очекува во иднина, но моментално е тешко да се предвиди кога,“ додава тој.

Цените во урбаните делови на Белград значително варираат. Во зависност од староста на зградите и состојбата на становите, тие се движат од 3.000 до 5.000 евра по квадратен метар.

„Во центарот на Белград има големи разлики – од постари станови до нови, луксузни градби. Цените се движат од 3.000 до 5.000 евра за квадрат,“ истакнува Михајловиќ.

На прашањето што е подобро, Михајловиќ одговара дека изборот зависи од желбите и можностите на купувачот.

„Некои преферираат сосема нов стан, додека други сакаат да реновираат стар. Сѐ зависи од индивидуалните афинитети,“ заклучува тој.