Во кривопаланечко се чествува Свети Јоаким Осоговски

Светата православна црква денеска го чествува споменот на Свети Јоаким Осоговски, а во манасторот кај Крива Паланка што го носи името на овој светител, се очекува маса верници да го посети манастирот, да присуствува и на светата архиерејска литургија и во текот на денот да се поклонат пред светецот закрилник на вековното духовно светилиште и на градот.

Честувањето ќе започне во девет часот, со света архиерејска литургија, со која ќе чиноначалствува митрополитот кумановско-осоговски, г. Григориј, во сослужение со архиерејите од Кумановско-Осоговска епархија на МПЦ-ОА.

Светиот Јоаким Осоговски се подвизувал во  втората половина на единаесеттиот век, во местото Сарандопор, село Градец, кривопаланечко, каде и се упокоил. По неговата смрт била изградена манастирската црква кадешто биле положени неговите свети мошти, за да веднаш потоа крај нив започнат да се случуваат многубројни чуда.  Луѓето од сите краишта и по многу векови, до ден денешен, доаѓаат во овој манастир и црпат исцеление и помош преку молитвите на светиот отец Јоаким Осоговски.

Овој ден се слави во кривопаланечко како ден на патрон-светителот на градот, надоврзувајќи се на честувањата на вчерашниот голем празник, Успение на Пресвета Богородица, еден од главните празници во црковната година, што свечено се прославува и овде, во манастирот кадешто, покрај големиот храм посветен на свети Јоаким Осоговски, се наоѓа и црквата со лековита вода, посветена на Успението на Мајката Божја.

Во текот на вчерашниот ден во храмовите на манастирскиот комплекс се одржа Божествена Литургија на која присуствуваа голем број верници, а многумина по литургијата се причестија со светите Христови тајни.

Во пресрет на празничните денови во месноста Мартиница, кривопаланечко, на иницијатива на група граѓани беше поставен и осветен голем православен крст што ја осветлува Крива Паланка, а општината во чест на празничните денови организира и културна програма, концерти и уметнички перформанси за сите посетители на градот во овие денови со кои се заокружува августовската програма на „Кривопаланечко културно лето“.

На градскито стадион во Крива Паланка вечер и утревечер ќе се одржат музички концерти на кои ќе настапат повеќе балкански музички ѕвезди, а градот се очекува да го посетат неколку десетици илјади туристи и гости од земјава и соседството.