Skip to content
Нема повеќе црвени предупредувања во ниту еден регион на Шпанија, на сила е само портокалово во западниот дел на Андалузија и на брегот на Валенсија, каде се очекуваат дополнителни намалувања на предупредувањата. Но, во текот на ноќта, службите за итни случаи беа во акција додека пороите се слеваа низ улиците
Во Валенсија се уште се работи на санирање на штетите по поплавите на крајот на октомври, во кои загинаа над 200 луѓе. Иако се очекуваше обилните дождови да донесат големи проблеми и во изминатите денови, сепак најпогодените подрачја забележаа нешто послабо невреме и помала количина на дожд.
Се повикуваат граѓаните да бидат многу внимателни.
Обилните дождови во Валенсија предизвикаа евакуација и затворање на патиштата
Регионалните противпожарни и спасувачки служби во Валенсија испратија четири спасувачки екипи, додека службите во Кастелон и Аликанте се уште немаат дополнителни интервенции. Во текот на ноќта поради поплави и одрони биле затворени два патни правци, извести Центар 112.
На терен се повеќе од 2.700 пожарникари од повеќе од 45 организации, околу 8.600 припадници на војската, вклучително и специјализираната единица за вонредни ситуации (УМЕ), како и над 800 волонтери од Цивилната заштита кои даваат поддршка во најпогодените области. Полицијата, исто така, го зголеми своето присуство со повеќе од 9.700 припадници на Националната полиција и цивилна гарда, над 500 локални полицајци.
Со цел да се заштитат граѓаните, воведени се привремени мерки, вклучително и суспензија на едукативните и спортските активности, затворање на дневните центри и ограничување на сообраќајот за приватни возила, освен за итните служби и компаниите одговорни за снабдување со основни услуги, како што се како вода, енергија и храна. На граѓаните им се препорачува да избегнуваат употреба на пумпи за испумпување на вода во затворени простори поради опасност од вдишување на јаглерод моноксид, а во најпогодените места се препорачува употреба на флаширана вода за пиење и готвење.
На погодените места се препорачува носење заштитна маска, очила, соодветни обувки и долга облека. Отворени се специјални канцеларии за помош за настраданите граѓани.
Големите количества дожд и силните бури на море го отежнуваат спасувањето на море, особено во области како што се Гандиа и Денија. Во текот на ноќта дополнително беше зајакнат мониторингот на потоците и критичните точки за да се спречат поголеми штети, додека на некои акумулации како Улдекона и Марија Кристина се вршат контролирани испуштања за регулирање на нивото на водата.
Се повикуваат жителите на регионот да ги следат упатствата на службите за итни случаи и да се придржуваат до безбедносните мерки за да ја осигураат нивната безбедност.
Во текот на ноќта пожарникарите спасиле четири лица во провинцијата Валенсија поради обилните дождови, според информациите објавени на социјалните мрежи. Во другите провинции немаше поголеми инциденти поврзани со временските услови, иако некои патишта беа затворени.
Брзите возови меѓу Мадрид и Валенсија, кои беа прекинати од 29 октомври поради оштетување на железничката инфраструктура предизвикана од временските услови (ДАНА), нема да продолжат во четврток наутро како што беше планирано. Возовите ќе почнат да сообраќаат најрано напладне.
Десетици летови се одложени откако силната бура со силен ветер и силен дожд ја погоди популарната шпанска туристичка дестинација Коста дел Сол.
Илјадници жители се евакуирани долж реката Гвадалхорсе западно од Малага поради високиот ризик од поплави, додека болниците се поплавени; медицинскиот персонал беше фотографиран како минува низ вода во ходниците на одделенијата.
