За граѓаните трошки, а платите на вработените во Владата догодина ќе пораснат за над 50 проценти

Платите на дел од вработените во Владата и државните институции следната година ќе се зголемат значително, покажува предлог-буџетот за 2025 година, кој моментално е во собраниска процедура. Просечната бруто плата за вработените во Владата ќе се зголеми за 51,65% и ќе достигне 137.226 денари (околу 2.231 евра). Ова значи дека нето платите ќе бидат околу 89.877 денари (1.500 евра), што е раст од речиси 50% во споредба со оваа година, објави Телма.

Најголеми примања ќе имаат вработените во новоформираното Министерство за енергетика, каде бруто платата ќе достигне 161.533 денари (2.627 евра), додека нето износот ќе биде 105.628 денари (1.717 евра).

Советот на јавни обвинители со бруто плата од 147.703 денари (2.402 евра) и нето износ од 96.665 денари (1.572 евра).
Владата со просечна бруто плата од 137.226 денари и нето износ од 89.877 денари.
Во Дирекцијата за ТИРЗ (Технолошки индустриски развојни зони) се предвидува најголемо процентуално зголемување на платите од 78%, што ќе резултира со просечна бруто плата од 110.115 денари, значително над нивото од претходната година.

За разлика од овие институции, платите на вработените во Собранието ќе бележат минимален пад. Во 2025 година, просечната бруто плата ќе изнесува 134.078 денари, што е намалување од 892 денари во споредба со оваа година.

Овие бројки отвораат дебата за приоритетите на Владата, особено во време кога граѓаните се соочуваат со висока инфлација и ниски примања. Зголемувањата на платите во јавниот сектор ја потенцираат потребата од поголема транспарентност и дебата за распределбата на јавните средства.