Skip to content
Во периодот од јули до септември 2024 година, Регистарот на цени и закупнини забележа 7.491 трансакција, од кои 5.525 се купопродажби на недвижности, а 1.966 се закупи, покажуваат податоците на Агенцијата за катастар на недвижности.
Во периодот од јули до септември 2024 година, во Регистарот на цени и закупнини се забележани 7.491 трансакција, од кои 5.525 се купопродажби на недвижности, а 1.966 се закупи.
Вкупната вредност на регистрираните купопродажби во овој период изнесува 237 милиони евра. Од нив, најголем дел се однесуваат на станови – 2.115 трансакции во вредност од 128 милиони евра. Дополнително, реализирани се 644 купопродажби на куќи во вредност од 40 милиони евра, 189 купопродажби на деловни простории во вредност од 25 милиони евра, 1.651 трансакција на земјоделско земјиште за 15 милиони евра, 630 трансакции на градежно земјиште за 18 милиони евра и 178 продажби на гаражи со вкупна вредност од 2 милиони евра.
Во третиот квартал е забележан раст кај продажбите на станови во споредба со вториот квартал, кога биле реализирани 1.697 трансакции во вредност од 102 милиони евра. Најмногу купопродажби во овој период се регистрирани во септември – вкупно 1.923, додека најмалку во август – 1.748. Што се однесува до закупите, во третиот квартал тие изнесуваат вкупно 797 илјади евра, а најголем број се регистрирани во септември – 737, додека најмалку во август – 581. Од вкупно регистрираните закупи, 743 се однесуваат на станови, 689 на државни парцели, 259 на куќи, 174 на земјоделско земјиште, 46 на индустриски објекти, 28 на градежно земјиште и 17 на гаражи.
Според податоците на Државниот завод за статистика, во септември 2024 година се издадени 296 одобренија за градење, што е за 9,2 проценти помалку во однос на истиот месец од претходната година. Од вкупниот број издадени одобренија, 146 се наменети за објекти од високоградба, со планирана изградба на 755 станови со вкупна корисна површина од 67.372 квадратни метри.
