Жена паднала од надвозникот на обиколницата во Скопје и ја прегазило кола

Јавен обвинител од Основното јавно обвинителство Скопје, заедно со екипи од МВР, изврши увид на местото каде што синоќа едно лице го загуби животот на скопската обиколница.

Првичните информации сугерираат дека починатата, женско лице, или се движела пеш по автопатот или паднала од надвозникот врз коловозот. Во тој момент, автомобил кој се движел по обиколницата удрил во неа. Настанот се случил во услови на намалена видливост.

Возачот на автомобилот веднаш бил подложен на алкотест, при што е утврдено дека не управувал под дејство на алкохол.

Обвинителството издаде наредба за обдукција, а прибраните траги и материјални докази ќе бидат предмет на дополнително вештачење. Во исто време, се разговара со очевидци за да се утврдат сите детали и околности поврзани со несреќата.