Ахмети си игра топло-ладно со власта на Мицкоски, сега не знае каде е Груби

Лидеротна ДУИ, Али Ахмети, откако во јавноста дигна прашина со тврдењата дека Артан Груби се наоѓал на албанска територија, денеска го смени ставот и сега вели дека нема детали за локацијата на својот најблизок соработник.

Лидерот на ДУИ, Али Ахмети тврди дека не знае каде се наоѓа поранешниот вицепремиер, Артан Груби, откако вчера за неговиот најблизок соработник рече дека е добар и се наоѓа на албанска територија, но немале средба.

По денешните реакции во јавноста да каже каде се наоѓа Груби, кој се бара со меѓународна потерница за криминал во Државна Лотарија, Ахмети изјави за „ТВ21“ дека не контактирале лично и нема детални информации каде е тој во моментов.

„Немам детални информации каде актуелно се наоѓа. Мојата изјава во текот на вчерашниот ден е базирана на тоа што е јавно изјавено од претставници на Владата, но исто така и од фактот дека тој легално си ја поминал границата Македонија-Косово“, рече Ахмети во изјава за телевизијата повторувајќи  дека Груби заслужува правичен и неселективен судски процес.

Меѓу осомничените за овој случај е и поранешниот директор на Државната лотарија, Прпарим Бајрами, кој истотака, не е достапен за органите на прогонот.