Белград купува оружје од Израел во вредност од 335 милиони долари; Вучиќ се пофали: „Помоќен е од ХИМАРС, подготвени сме!

Србија го финализираше договорот за набавка на оружје во вредност од 335 милиони долари со израелската одбранбена компанија „Елбит системс“, дознава израелскиот весник „Хаарец“.

Договорот вклучува напредни артилериски и беспилотни системи, вклучително и артилериски ракетен фрлач PULS (прецизен и универзален систем за лансирање), ракетен фрлач со повеќе цевки развиен од Israel Military Industries, подружница на израелската компанија Elbit Systems.

PULS е флексибилна платформа која лесно може да се опреми со системи на домашна воена индустрија или производи од трети страни. За разлика од стандардните системи за повеќекратни ракетни фрлачи, кај PULS не е потребно движење на артилериските единици поради дострелот на оружјето. Имено, PULS може да лансира различни видови ракети на различни растојанија од иста позиција. Има домет до 300 километри. Оваа способност овозможува брзо и ефикасно дејствување без потреба од преместување на системот, што го прави идеален за сценарија за брз одговор во различни воени операции. Неодамна српска компанија со блиски врски со властите увезе воени камиони од Кина способни да носат ракетни фрлачи, пишува Харезт.

Шпекулациите за можна набавка на оружје од Израел започнаа кон крајот на ноември, кога српскиот претседател Александар Вучиќ најави набавка на нови високопрецизни артилериски системи земја-земја.

„Го набавуваме најсофистицираното оружје во светот, со директна комуникација од командниот центар преку беспилотни летала до ракетната артилерија, која веднаш цели и уништува се. Беспрекорно. Посилен од ХИМАРС“, изјави тогаш Вучиќ.

Новите аквизиции ќе и овозможат на Србија да одговори на секој предизвик, вклучително и на оние „кои мислат дека имаат предност пред нас“, додаде Вучиќ, алудирајќи на купувањето на американските системи ХИМАРС од страна на Хрватска.

Купувањето на израелски системи и беспилотни летала од Србија е одговор на хрватското купување на американскиот ракетен систем ХИМАРС, во обид да се одржи стратешката рамнотежа во регионот.

Покрај новиот артилериски систем, Србија го набавува и новиот систем за беспилотни летала Хермес 900, кој наводно е многу понапреден од сегашната флота со која управуваат српските вооружени сили, пишува Хаарец.

„Добивме и нови, можеби едни од најдобрите системи за беспилотни летала во светот, кои се очекува да пристигнат во 2025 година“, рече Вучиќ во ноември.

Хермес 900 е повеќенаменско беспилотно летало (MALE UAS) и најголемото беспилотно летало на Елбит, способно да извршува широк опсег на мисии, вклучувајќи доминација во областа и континуирано надгледување, извидување и постигнување цели на копно и море. Овој напреден дрон може да носи тешки товари и да работи долги временски периоди, а е продаден на земји како Индија, Тајланд и Азербејџан.

Иако Србија не го именуваше конкретно производителот, компанијата „Елбит системс“ претходно изјави дека склучила договори во вредност од 335 милиони долари со „неименувана европска земја“ за набавка на системи ПУЛС и беспилотни летала Хермес 900.

„Договорите ќе се реализираат во период од три години и шест месеци“, пишува во соопштението на компанијата.

Израелско-српските односи се на многу високо ниво, особено по избувнувањето на војната во Газа и Либан, кога значително се зголеми извозот на оружје од Србија во Израел.

Според податоците на БИРН, Србија во текот на 2024 година извезла оружје во Израел во вредност од 23,1 милиони евра. Во претходната истрага, БИРН и Хаарец идентификуваа шест летови во февруари, март и мај кои одговараат на податоците за извозот, а според статистичките податоци собрани од Хаарец, Србија е на врвот на листата на земји од кои летаат израелски воени авиони.