Билјана Ивановска: ДКСК трбало да го прифати по автоматизам барањето на Цвета Ристовска за изземање од предметот за Бојан Христовски

Поранешната претседателка на Државната комисија за спречување корупција Билјана Ивановска за „Слободен печат“ вели дека барањето на член да се изземе од постапување за некој предмет што го работи Антикорупциска, е лично чувство, оценка и личен став и не подлежи на носење одлука од страна на другите членови.

„Барањето за изземање од постапување по предмет во ДКСК е лична одлука на членот, за што Комисијата нема потреба да одлучува понатаму. Тоа е лична оценка, став и чувство на членот. За изземање се поднесува изјава, која што потоа се доставува во Архивата на ДКСК и се известува комисијата на колегиум дека некој член се иззема. Така завршува таа постапка. Ако имало било какво барање за изземање, за тоа требаше да биде известена јавноста на јавна седница што во случајов изостана, изјави за „Слободен печат“, Ивановска.

Инаку, претседателката на Антикорупциска комисија Татјана Димитровска за „Телма“ изјави дека членката Цвета Ристовска што го водеше предметот за директорот на АНБ Бојан Христовски, побарала изземање, ама на колегиум сите антикорупционери едногласно не го прифатиле таквото нејзино барање.