Бугарите на дното, а кој има највисок стандард: Како живеат граѓаните на Европската унија? 

Големи разлики во животниот стандард на граѓаните на одредени земји од Европската унија беа забележани и во 2024 година, при што Луксембуржаните повторно ја зазедоа позицијата на најбогати, а Бугарите најсиромашни граѓани на Унијата. Канцеларијата за статистика на ЕУ Евростат објави податоци за тоа како живеат граѓаните на Европската унија. Според нив, најбогати се граѓаните на Луксембург и Ирска, а најскромни се Грците и Бугарите. Имено, куповната моќ на Бугарите едвај достигнува 60 отсто од просекот во Европската Унија, а за споредба куповната моќ на граѓаните на Луксембург и Ирска е 140 отсто и 112 отсто над просекот на ЕУ. 

По нив следат Холанѓаните, Данците и Австријците. Французите се точно во средината, а позади покрај Грците и Бугарите се и Литванците, Словаците и Хрватите. Кога станува збор за Грција, податоците на Евростат покажуваат дека, иако се на дното во Европа по куповна моќ и со години доживуваат финансиска криза, успеале да надминат тешка економска и социјална криза. Светските рејтинг агенции ги исчистија грчките државни обврзници од стигмата на „лошите“ инвестиции, а Грција втора година по ред бележи економски раст од над два отсто, иако грчкото население се уште живее лошо, покажуваат официјалните статистички податоци на Евростат. 

Инаку Грција се опорави од кризата трошејќи над 360 милијарди евра на долг за десет години, намалувајќи ги на сметка на јавната потрошувачка, платите и пензиите, додека инфлацијата продолжува да расте, особено цените на храната, бензините и киријата се високи, а трошоците за живот сè уште вртоглаво растат. Економското закрепнување се случува на грбот на народот, велат незадоволните синдикати и левичарските економисти, но централнодесничарската влада на премиерот Киријакос Мицотакис укажува на одлични економски резултати и предвидува дека инфлацијата наскоро ќе падне и животниот стандард ќе почне да расте. 

„Грција се оддалечува од ЕУ веќе десет години, а ќе се приближи во следната деценија, бидејќи ја врати довербата на инвеститорите“, изјави Алексис Пателис, главен економски советник на премиерот Мицотакис, пренесува Бета. 

Пателис посочува дека глобалните рејтинг агенции ја отстраниле ознаката „гнила“ од грчките државни обврзници, додека британскиот неделник „Економист“ ја оцени грчката економија како „најнапредна во 2023 година“. Меѓутоа, прашање е кога луѓето ќе го почувствуваат ова подобрување, особено ако се земе предвид дека Грците сè уште паметат дека пред финансиската криза во 2008 година живееле сосема пристојно, бидејќи грчкиот БДП по глава на жител бил 95 проценти од просекот на ЕУ. 

Населението во земјата моментално страда од високи трошоци за живот, а според податоците на Централната банка на Грција, 27 отсто од Грците се уште живеат на прагот на сиромаштија.